एरंडोल : चालकाचे ट्रकवरील नियंत्रण सुटताच भरधाव ट्रक झाडावर धडकल्याने झालेल्या भीषण अपघातात मध्यप्रदेशातील चालकासह क्लीनरचा मृत्यू झाला. हा अपघात गुरुवारी सकाळी साडेपाच वाजेच्या सुमारास म्हसावद रस्त्यावरील उमरदे गावाजवळ झाला.
नियंत्रण सुटल्यानेच अपघात
म्हसावदकडून एरंडोलकडे सकाळी साडेपाच वाजेच्या सुमारास लोखंडी आसारीने भरलेला ट्रक (क्रमांक एम.पी. ११ एच.०८५२) भरधाव वेगाने येत असताना उमरदे गावाजवळ ट्रकचालकाचे वाहनावरील नियंत्रण सुटल्यामुळे ट्रकने विरुद्ध दिशेच्या बाजूला असलेल्या निंबाच्या झाडास जोरदार धडक दिली. अपघातात ट्रकचा पुढील भाग चेपला जाऊन ट्रक पलटी झाला. या अपघातात ट्रकचालक प्रकाश गंगाराम बास्कले (३०) व क्लीनर शाहरुख खान सोहिल खान (१८, दोघे रा.धार, मध्यप्रदेश) ठार झाले. ट्रकमवरील मोबाईल क्रमांकावर संपर्क साधून ट्रकच्या मालकास अपघाताची माहिती देण्यात आली.
पोलिसांची अपघातस्थळी धाव
अपघाताची माहिती मिळताच पोलिस निरीक्षक ज्ञानेश्वर जाधव आणि त्यांच्या सहकार्‍यांनी घटनास्थळी धाव घेतली. ग्रामस्थांच्या मदतीने आणि क्रेनच्या सहाय्याने ट्रक आणि झाडात अडकलेला चालक प्रकाश बास्कले यास बाहेर काढले तसेच गंभीर जखमी असलेल्या शाहरुख खान सोहिल खान याच्यावर ग्रामीण रुग्णालयात प्राथमिक उपचार केल्यानंतर त्यास उपचारासाठी जळगाव येथे नेत असताना रस्त्यातच त्याचा मृत्यू झाला. पोलिस पाटील शेखर जगताप यांनी दिलेल्या तक्रारीवरून ट्रकचालक प्रकाश बास्कले याच्या विरोधात गुन्हा दाखल करण्यात आला. तपास पोलिस निरीक्षक ज्ञानेश्वर जाधव यांच्या मार्गदर्शनाखाली हवालदार काशीनाथ पाटील करीत आहेत.
