प्रतिनिधी – जितेंद्र काटे
भुसावळ – तालुक्यातील वराडसिम, गोजोरे, वांजोळा, गोंभी, सुनसगाव, बेलव्हाळ, कुऱ्हा पानाचे या परिसरात मोठ्या प्रमाणात वृक्षतोड सुरू असल्याने व वनविभागाचे अधिकारी व कर्मचारी कारवाई करीत नसल्याने वृक्षप्रेमी सुज्ञ नागरिकांनी संताप व्यक्त केला आहे.
या बाबत माहिती अशी की , गेल्या काही वर्षांपासून या परिसरात मोठ्या प्रमाणात वृक्षतोड सुरू आहे विशेष म्हणजे अवैध लाकूड तोडीचा व्यवसाय करणारे व्यापारी खुलेआम लाकूड तोडण्याचे साहित्य मोटरसायकल किंवा अन्य वाहनाने घेऊन जाताना दिसत आहेत. नशिराबाद – बोदवड रस्त्यावरून अनेक अधिकारी ये – जा करतात परंतु एकही अधिकारी लाकूड वाहतूक करणारे वाहन अडवत नाही आणि विचारपूस करीत नाही त्यामुळे वनविभागाचे व या लाकूड व्यावसायिकांचे साटेलोटे असल्याचे सांगितले जात आहे.
गोजोरे येथील ग्रामपंचायत कार्यालय व ग्रामस्थांनी अनेक वर्षांपासून ग्रामसभेत ठराव मंजूर केला आहे की गोजोरे शिवारात कोणत्याही प्रकारची अवैध वृक्षतोड करण्यात येऊ नये असे ठरले आहे. मात्र इतर गावांतील ग्रामपंचायत कार्यालयाने सुध्दा ग्रामसभा घेऊन अवैध वृक्षतोडीवर आळा घालावा असे बोलले जात आहे.
गोजोरे रस्त्यावरून अवैध लाकूड रोखण्यासाठी प्रयत्न करणार असल्याचे गोजोरे येथील जागरूक व वृक्षप्रेमी सुज्ञ नागरिकांनी सांगितले आहे.
वनविभागाचे अधिकारी व कर्मचारी यांनी ठरविल्यास अवैध वृक्षतोडीवर आळा बसेल असे बोलले जात आहे. त्यामुळे संबंधित अधिकाऱ्यांनी याकडे गांभीर्याने लक्ष देऊन वृक्षतोड थांबवावी अशी मागणी केली जात आहे.