जम्मू आणि काश्मीरमध्ये २२ एप्रिल रोजी झालेल्या दहशतवादी हल्ल्यावर संयुक्त राष्ट्र सुरक्षा परिषद (UNSC) ने कडक शब्दांत निषेध केला आहे. या भीषण हल्ल्यात २५ भारतीय आणि एका नेपाळी नागरिकाचा मृत्यू झाला असून अनेक जखमी झाले आहेत. मृत्यूमुखी पडलेले बहुतांश पर्यटक देशभरातून आलेले होते.

१५ सदस्यीय सुरक्षा परिषदेने जारी केलेल्या प्रेस स्टेटमेंटमध्ये नमूद केले की, “जम्मू आणि काश्मीरमध्ये २२ एप्रिल रोजी घडलेल्या दहशतवादी हल्ल्याचा आम्ही कठोर शब्दांत निषेध करतो. या भ्याड कृतीस जबाबदार असलेल्या गुन्हेगारांना आणि त्यांचे आयोजक व प्रायोजक यांना न्यायासमोर उभे केले पाहिजे.”

परिषद सदस्यांनी स्पष्ट केले की, दहशतवादाच्या कोणत्याही स्वरूपाला जगभरात कोणतीही जागा नाही आणि अशा घटना आंतरराष्ट्रीय शांतता व सुरक्षेस गंभीर धोका आहेत.

जवाबदारांवर कठोर कारवाईची मागणी

UNSC च्या निवेदनात म्हटले आहे की, “दहशतवादी हल्ल्याचे दोषी, आयोजक, आर्थिक मदत करणारे व प्रायोजक यांना पकडून त्यांच्यावर आंतरराष्ट्रीय कायद्याच्या चौकटीत कारवाई केली जावी.”
त्यांनी सर्व देशांना आंतरराष्ट्रीय कायदे आणि सुरक्षा परिषदेच्या ठरावांनुसार संबंधित अधिकाऱ्यांशी सक्रियपणे सहकार्य करण्याचे आवाहन केले.

या निवेदनावर सर्व १५ सदस्य देशांनी एकमताने सहमती दर्शवली. फ्रान्सने एप्रिल महिन्यात सुरक्षा परिषदेचे अध्यक्षस्थान भूषवले असून, फ्रान्सचे संयुक्त राष्ट्रातील कायमस्वरूपी प्रतिनिधी जेरोम बोनाफोंट यांनी हे प्रेस स्टेटमेंट जाहीर केले.

सूत्रांनी दिलेल्या माहितीनुसार, अमेरिकेने या प्रेस स्टेटमेंटचा प्रारूप तयार केला होता, ज्यावर नंतर सर्व सदस्यांनी चर्चा करून अंतिम स्वरूप दिले.

भारत आणि नेपाळच्या नागरिकांसाठी शोकसंवेदना

परिषदेच्या सदस्यांनी भारत सरकार, नेपाळ सरकार आणि पीडित कुटुंबीयांसाठी आपल्या गाढ शोकसंवेदना व्यक्त केल्या आहेत. त्यांनी जखमींना लवकर बरे होण्याच्या शुभेच्छाही दिल्या.

दहशतवादाविरोधात सर्व देशांनी एकत्र येण्याचा पुनरुच्चार

UNSC ने पुन्हा एकदा स्पष्ट केले की, “दहशतवाद कोणत्याही स्वरूपात असो, तो अन्यायकारक व गुन्हेगारी स्वरूपाचा आहे.”
त्यांनी सर्व देशांना संयुक्त राष्ट्रांचे तत्व आणि आंतरराष्ट्रीय कायद्याचे पालन करत दहशतवादाशी सर्वतोपरी लढा देण्याचे आवाहन केले.

UN महासचिवांचेही तीव्र प्रतिक्रिये

UN महासचिवांचे प्रवक्ते स्टेफेन दुजारिक यांनीही दैनंदिन पत्रकार परिषदेत प्रतिक्रिया दिली. ते म्हणाले, “आम्ही जम्मू आणि काश्मीरमधील परिस्थितीवर अत्यंत गंभीरतेने लक्ष ठेवत आहोत. या दहशतवादी हल्ल्याचा आम्ही तीव्र निषेध करतो आणि भारत व पाकिस्तान दोन्ही सरकारांना संयम बाळगण्याचे आवाहन करतो.”

जेव्हा पत्रकारांनी विचारले की, महासचिव अँटोनियो गुटेरेस भारत व पाकिस्तानच्या नेत्यांशी थेट संपर्क साधतील का, तेव्हा दुजारिक म्हणाले, “महासचिव रोममध्ये पोप फ्रान्सिस यांच्या अंत्यसंस्कारासाठी गेले आहेत. ते न्यूयॉर्कला परतल्यानंतर याबाबत अधिक माहिती देऊ.”

दुजारिक यांनी स्पष्टपणे नकार दिला की, भारत-पाकिस्तानमध्ये तणाव वाढल्यामुळे युद्धजन्य परिस्थिती उद्भवेल असा कोणताही निष्कर्ष आम्ही मान्य करीत नाही. “आम्ही दोन्ही देशांच्या परिस्थितीवर बारकाईने लक्ष ठेवत आहोत,” असे ते म्हणाले.

हल्ल्याचा आंतरराष्ट्रीय स्तरावर परिणाम

हा हल्ला आंतरराष्ट्रीय स्तरावरही चिंता व्यक्त करणारा ठरला आहे. जागतिक नेत्यांनी भारताच्या सोबत एकजूट दर्शवली असून, दहशतवादाविरोधात कठोर भूमिका घेण्याचा निर्धार व्यक्त केला आहे. भारतानेही सर्व दोषींना शोधून कडक कारवाई करण्याची ग्वाही दिली आहे.

या घटनेमुळे जम्मू आणि काश्मीरमधील सुरक्षा व्यवस्थेवर पुन्हा प्रश्नचिन्ह निर्माण झाले असून, केंद्रीय गृहमंत्रालयाने तपास आणि सुरक्षा व्यवस्था अधिक बळकट करण्याचे निर्देश दिले आहेत.