चोपडा प्रतिनिधी (महेश गायकवाड)
अडावद ता. -विविध विकास कामांसाठी चार कोटी ९७ लाख रुपयांचा निधी मंजूर झाला. यात उनपदेव या तीर्थक्षेत्राचा पर्यटन विकासाच्या दृष्टीने परिसरातील मंदिरे, स्नानकुंड, इमारतींचे नूतनीकरण, निसर्ग परिचर केंद्र, नावीन्यपूर्ण पॅगोडेसह सेल्फी पॉईन्ट अनेक सुविधा निर्माण करण्याकरिता पर्यटकांसाठी सुसज्ज सुविधा उपलब्ध केल्या जाणार आहेत.
चोपडा तालुक्यातील अडावद जवळील सातपुडा पर्वताच्या पायथ्याशी प्रभू श्री रामचंद्र यांच्या पादस्पर्शाने पुनीत झालेल्या पवित्र तीर्थक्षेत्र उनपदेव येथे आमदार सौ.लताताई चंद्रकांत सोनवणे यांच्या पाठपुराव्याने पर्यटन विकास व सांस्कृतिक कार्य मंत्रालयाच्या माध्यमातून विविध विकासकामे मंजूर करण्यात आली.
या तीर्थक्षेत्रावर सातपुड्याच्या यावल अभयारण्यातील पर्यटकांसाठी विविध सुविधा व्हाव्या म्हणून चोपडा विधानसभेच्या आमदार सौ.लताताई चंद्रकांत सोनवणे, माजी आमदार प्रा.चंद्रकांत सोनवणे यांनी राज्याचे पर्यटन व सांस्कृतिक मंत्री आदित्य ठाकरे यांच्याकडे पाठपुरावा केला. तीर्थक्षेत्रासाठी चार कोटी ९७ लाख रुपयांचा निधी मिळवून घेतला. यासंदर्भात शासन निर्णय नुकताच जाहीर झाला असून या निधीतून पर्यटकांना आकर्षित करण्यासाठी विविध सुविधा उपलब्ध केल्या जाणार आहेत. यामुळे या तीर्थक्षेत्राचा अधिक विकास होणार असून उनपदेव येथे येणाऱ्या भाविकांसह पर्यटकांना पर्यटनाचा आनंद देखील आता मिळू शकणार आहे. अडावदच्या उत्तरेस सातपुडा पर्वताच्या कुशीत प्रभू श्रीरामचंद्र, सितामाई व लक्ष्मण यांच्या पादस्पर्शाने पावन झालेल्या भूमीत उनपदेव हे तीर्थक्षेत्र व पर्यटनक्षेत्र आहे.
पर्यटन विकास असा..
श्रीतीर्थक्षेत्र उनपदेव क्षेत्र येथे श्रीरामचंद्रांनी बाण मारलेल्या जागी गरम पाण्याचा झरा अनादिकालापासून वाहत आहे. त्यासभोवती पर्यटकांना स्नानकुंड बांधण्यात आले आहे. ते फार जुने झाले आहे त्याचे संपूर्ण नूतनीकरण आधुनिक पद्धतीने शिवकालीन पद्धतीचे तयार करण्यात येणार आहे. सभोवती मंदिर व धर्मशाळेचे नुतनीकरण होणार आहे. तसेच पर्यटक आनंदायक वातावरण निर्मितीसाठी सर्व बगीच्यांना विकसित करण्यात येणार आहे. त्याठिकाणी पर्यटकांसाठी नावीन्यपूर्ण पॅगोडे तयार केले जाणार आहेत. तसेच निसर्ग परिचर केंद्राचे नूतनीकरण, संपूर्ण परिसरात सोलर विजेवर विद्युत रोषणाई करणे, संपूर्ण परिसरास रंगरंगोटी करणे, पर्यटकांसाठी पिण्याच्या पाण्यासाठी टाकी तसेच स्वच्छतेच्या सोयी निर्माण करणे. सीसीटीव्ही कॅमेरे बसवणे अशा विविध सुविधांची निर्मितीसाठी बऱ्याच वर्षांनंतर निधी उपलब्ध होत असल्याने एका पौराणिक, ऐतिहासिक, व निसर्गाच्या सानिध्यात असलेल्या श्रीतीर्थक्ष्रेत्र उनपदेवचा कायापालट होणार आहे.
मुख्य आकर्षण सातपुडा हा आदिवासी संस्कृती जपणारा पर्वत आहे. त्यातील आदिवासींची जीवनशैली , सांस्कृतिक परंपरांचे दर्शन घडविणारे मुझियमची निर्मिती याठिकाणी होणार आहे.
मिनीरेल्वे ट्रॅक दुरुस्ती
पर्यटन मंत्री आदित्य ठाकरे यांच्या माध्यमातून श्रीतीर्थक्षेत्र उनपदेव हे पर्यटन स्थळ विकसित करण्यासाठी चार कोटी ९७ लाख रुपयांचा निधी मंजूर करण्यात आला असून रेल्वे ट्रॅक नूतनीकरण करण्यात येणार आहे. या ठिकाणी असलेली मिनी रेल्वे पर्यटकांसाठी आकर्षणाचा केंद्रबिंदू होती मात्र निधी अभावी ती बंद अवस्थेत पडलेली आहे ती दुरुस्त व्हावी अशी अपेक्षा होती. ती आता पूर्ण होत उनपदेव हे तीर्थक्षेत्र पर्यटन क्षेत्र म्हणून विकसित करण्यासाठी आपण पाठपुरावा करीत होतो. असे आमदार सोनवणे यांनी सांगितले.
आमदार लताताई सोनवणे,प्रा चंद्रकांत सोनवणे माजी आमदार यांचे सौ भावनाताई माळी लोक नियुक्त सरपंच अडावद,सौ भारतीताई महाजन उपसरपंच अडावद, संजीव शिरसाठ आदिवासी समाज सेवक,समस्थ सातपुडातील आदिवासी समाज व समस्थ शिवसैनिक यांनी आभार मानले.