महाराष्ट्रात महाविकास आघाडीच्या बाजूने जनमताचा कौल दिसत असून भाजपच्या प्रचारासाठी नरेंद्र मोदी आणि अमित शहा यांचे महाराष्ट्रात सातत्याने दौरे होत आहेत. राज्यात 45 प्लस जागा जिंकण्याचे भाजपचे स्वप्न आहे. मात्र, आतापर्यंत झालेल्या सर्वेक्षणातून ते स्वप्न पूर्ण होणार नाही असे दिसत आहे. त्यामुळे राज्यात जास्तीतजास्त जागा जिंकण्यासाठी मोदी आणि शहा दौरे करत आहेत. पंतप्रधान नरेंद्र मोदी यांची पुणे जिल्ह्यात सभा होणार आहे. या सभेवरून राष्ट्रवादी काँग्रेस शरदचंद्र पवार पक्षाच्या सुप्रिया सुळे यांनी नरेंद्र मोदी यांना टोला लगावला आहे.
अतिथी देवो भव! ही आपली संस्कृती आहे. जे पाहुणे येतील, त्यांचे आम्ही स्वागतच करणार आहेत. तुतारी वाजवून आम्ही येणाऱ्या प्रत्येक पाहुण्याचे स्वागत करू, असे सुप्रिया सुळे म्हणाल्या. पंतप्रधान नरेंद्र मोदी पुण्यात येणार आहेत. त्यांचेही आम्ही तुतारी वाजवून स्वागत करू, असा टोला सुप्रिया सुळे यांनी लगावला.पूनम महाजन यांचे तिकीट कापल्याबाबतही त्यांनी प्रतिक्रिया दिली. पूनम महाजन यांनी अनेक वर्षे चांगले काम केले आहे. त्यांचे वडील प्रमोद महाजन हे केवळ भाजपच नाही तर देशाच्या राजकारणातील एक मोठे नेते होते. त्यांचे तिकीट कापण्यात आले, हे आश्चर्यंकारक असल्याचे सुप्रिया सुळे यांनी सांगितले.
