प्रतिनिधी – जितेंद्र काटे
भुसावळ – तालुक्यातील गोजोरे – सुनसगाव रस्त्यावर असलेल्या सुदर्शन पेपर मील फाट्यावर दि. १० एप्रिल रोजी सकाळी १२ वाजेच्या सुमारास मिनी ट्रक व मोटरसायकल यांचा अपघात होऊन परप्रांतीय दोन जण जागीच ठार झाल्याची घटना घडली. या बाबत प्रत्यक्ष पाहिलेली घटना अशी की रामसिंग भिलाला व मोटला भिलाला हे दोन्ही मोटरसायकल क्रमांक एम पी १० झेड बी ०४०१ ने शेताकडून सुनसगाव – गोजोरा रोडवर चढल्यावर सुनसगाव कडून गोजोरा कडे जाणाऱ्या ४०७ मिनी ट्रक क्रमांक एम एच १५ डी के १५६९ या वाहनाने धडक दिल्याने दोघांचा जागीच मृत्यू झाला तर या अपघातात मोटरसायकल चक्काचूर झाली तर दोन्ही मृतदेह रस्त्यावर फेकले गेले.
या बाबत पोलीसांनी दिलेली माहिती अशी की, शांताराम गमरीया भिलाला ह मु सुनसगाव यांनी फिर्याद दिली आहे की,दि.१० एप्रिल रोजी दुपारी शेताच्या रस्त्याने येऊन सुदर्शन पेपर मील कडे जाणाऱ्या रोड च्या समोर सुनसगाव – गोजोरा रोडवर चढत असताना सुनसगाव – गोजोरा रोडवर सार्वजनिक जागी मोटरसायकल व मिनी ट्रक यांचा अपघात होऊन या अपघातामुळे रामसिंग गमरीया भिलाला ( वय ४७ ) रा.कोटबैंडा पो. पिपलपोझा ता.झिर्निया जि. खरगोन मध्यप्रदेश व मोटला छितरीया भिलाला ( वय ४० ) रा.घर नं २३४ मसानिया फाल्या , ग्रामपंचायत उमारीया,ता.भगवानपुरा जि.खरगोन मध्यप्रदेश या दोघांचा जागीच मृत्यू झाला आहे.
या बाबत माहिती मिळताच भुसावळ तालुका पोलीस स्टेशन चे पोलीस निरीक्षक बबनराव जगताप व पोऊनि पूजा अंधारे तसेच कुऱ्हा पानाचे औट पोष्ट चे पोलीस कर्मचारी दिपक जाधव, प्रेमचंद सपकाळे, उमेश बारी व चालक सादिक शेख घटनास्थळी दाखल झाले व पंचनामा केला आहे. मिनी ट्रक चालकाला अटक करण्यात आली असल्याचे समजते.या बाबत भुसावळ तालुका पोलीस स्टेशन मध्ये अकस्मात मृत्यू क्रमांक ७३/२०२४ नोंद करण्यात आली आहे. घटनास्थळी सुनसगाव पोलीस पाटील खुशाल पाटील, उपसरपंच एकनाथ सपकाळे, सामाजिक कार्यकर्ते व सरपंच पती भोजराज कोळी, पत्रकार जितेंद्र काटे , गोजोरा येथील भागवत कोळी, सुदर्शन पेपर मील व शिवशक्ती व श्रीराम पेपर मील चे कर्मचारी तसेच परिसरातील नागरिकांनी सहकार्य केले. यावेळी रुग्णवाहिका १०८ ला पाचारण करण्यात आले मात्र मृतदेह असल्याने १०८ रुग्णवाहिका परत गेली तसेच भुसावळ येथील दोन खाजगी रुग्णवाहिका बोलाविण्यात आल्यावर मृतदेह शवविच्छेदनासाठी ट्रामा सेंटर भुसावळ येथे रवाना करण्यात आले यावेळी नागरिकांनी मोठी गर्दी केली होती.