अमळनेर – तालुक्यातील मांडळ येथील दोन शिक्षकांचे कुटुंब राजस्थान मधील जैसलमेर येथे फिरायला गेले होते. सोमवारी १३ रोजी राजस्थानमध्ये झालेल्या कार व कंटेंनेरच्या अपघातात पाच जण जागीच ठार तर एक जण गंभीर जखमी झाल्याची घटना दुपारी तीन वाजेच्या सुमारास घडली आहे. तर उपचार दरम्यान एका महिलेचा देखील मृत्यू झालेला आहे.
मांडळ येथील शिक्षक धनराज नागराज सोनवणे (वय ५५, रा. बेटावद) व योगेश धोंडू साळुंखे (वय ३४, रा. पिंपळे रोड,अमळनेर) या दोन्ही शिक्षकांचे कुटुंब वाहन क्र एम.एच०४. ९११४ ने राजस्थान येथे फिरायला गेले होते. दि. १३ रोजी दुपारी पावणे तीन वाजता बारमेर रस्त्यावर डोरीमना गावाजवळ एका कंटेनरने धडक दिल्याने धनराज सोनवणे, त्यांची मुलगी स्वरांजली, गायत्री योगेश साळुंखे (वय ३०), प्रशांत योगेश साळुंखे (वय ७) व भाग्यलक्ष्मी योगेश साळुंखे (वय १) यांचा जागीच मृत्यू झाला.
धनराज सोनवणे यांच्या पत्नी सुरेखा गंभीर जखमी होत्या त्यांचा उपचारादरम्यान मृत्यू झाला आहे. मंत्री अनिल पाटील व माजी आमदार शिरीष चौधरी यांनी मदतीसाठी तातडीने हालचाली करून तेथील जिल्हाधिकारी व पोलीस अधिक्षकांशी बोलणे केले.