पहलगाम, जम्मू-काश्मीर – १७ एप्रिल रोजी जम्मू-काश्मीरच्या पहलगाममध्ये घडलेल्या दहशतवादी हल्ल्याने देशभरात संतापाची लाट उसळली असून या हल्ल्यात २८ निष्पाप नागरिकांचा बळी गेला. या घटनेवर प्रतिक्रिया देताना व्यावसायिक आणि काँग्रेस खासदार प्रियंका गांधी यांचे पती रॉबर्ट वढेरा यांनी भाजप सरकारच्या हिंदुत्ववादी धोरणावर थेट सवाल उपस्थित केले. त्यांच्या वक्तव्यामुळे राजकीय वर्तुळात तीव्र प्रतिक्रिया उमटल्या आहेत.

रॉबर्ट वढेरा म्हणाले, “या दहशतवादी घटनेचा बारकाईने विचार केला तर दिसून येते की दहशतवादी लोकांची ओळख तपासत होते. ते कोणत्या धर्माचे आहेत हे बघूनच हत्या करत होते. ही मानसिकता का आली आहे? कारण देशात हिंदू, मुस्लिम आणि ख्रिश्चन समुदायांमध्ये दरी निर्माण झाली आहे. हे सरकारच्या विभाजनवादी राजकारणामुळे घडत आहे.”

ते पुढे म्हणाले, “आज देशात अल्पसंख्याक कमकुवत वाटत आहेत. त्यांच्या मनात असुरक्षिततेची भावना निर्माण झाली आहे. त्यामुळे अशा दहशतवादी घटनांना खतपाणी मिळते. यामुळेच आपण एकत्र राहण्याची गरज आहे. कोविडच्या काळात हिंदू-मुस्लिम एकत्र आले आणि एकमेकांना मदत केली होती. मात्र, आज राजकीय स्वार्थासाठी समाजात फूट पाडण्याचे प्रयत्न सुरू आहेत. ही केवळ माझी वैयक्तिक मत आहे, मी काँग्रेस किंवा माझ्या कुटुंबाच्या वतीने बोलत नाही.”

भाजपची तिखट प्रतिक्रिया

वढेरांच्या वक्तव्यावर भाजपकडून तात्काळ आणि कठोर प्रतिक्रिया आली. भाजपचे प्रवक्ते शहजाद पूनावाला यांनी वढेरांच्या वक्तव्यावर संताप व्यक्त करताना म्हटले, “ही अत्यंत लाजिरवाणी आणि भयावह प्रतिक्रिया आहे. काँग्रेस पक्षाच्या वतीने रॉबर्ट वढेरा हे दहशतवाद्यांना संरक्षण देत आहेत. हे वक्तव्य पाकिस्तानच्या दहशतवाद्यांना पाठीशी घालण्यासारखे आहे. हिंदूंना दोष देऊन इस्लामी जिहादचे समर्थन करण्याचा प्रयत्न आहे.”

शहजाद पूनावाला यांनी आरोप केला की, “वढेरांचे वक्तव्य हे सोनिया गांधी आणि राहुल गांधी यांच्या आदेशानेच दिले गेले आहे. ही काँग्रेसची दुहेरी भूमिका स्पष्ट करते.”

भाजपचे दुसरे प्रवक्ते नलिन कोहली यांनीही वढेरांवर जोरदार टीका केली. ते म्हणाले, “वढेरांचे वक्तव्य संपूर्णपणे निषेधार्ह आहे. ते दहशतवाद्यांच्या भाषेत बोलत आहेत. हेच शब्द दहशतवादी त्यांच्या हिंसक कृतींचे समर्थन करण्यासाठी वापरतात. एवढ्या भीषण हल्ल्यावर संपूर्ण देश एकत्र उभा असताना, वढेरा राजकारण करत आहेत.”

कोहली यांनी मागणी केली की, “काँग्रेस पक्षाने यावर स्पष्टीकरण द्यावे. रॉबर्ट वढेरांनी त्वरित माफी मागावी. त्यांनी अशा वेळी केलेले वक्तव्य देशविरोधी मानसिकतेला पाठिंबा देणारे आहे.”

वढेरांचे प्रत्युत्तर

रॉबर्ट वढेरा यांनी भाजपच्या आरोपांवर उत्तर देताना म्हटले की, “मी नेहमीच अल्पसंख्याकांच्या बाजूने बोललो आहे. त्यामुळेच माझ्यावर ईडीने चौकशी केली. माझ्या भूमिकेमुळे मला त्रास सहन करावा लागला आहे, पण मी माझे मत व्यक्त करत राहीन.”