नांदेड ग्रामीण पोलिसांची विशेष कामगिरी;पाच तासात मुद्देमालासह आरोपींनाही घेतले ताब्यात 

नांदेड जिल्हा प्रतिनिधी:उद्धव मामडे रावधानोरकर

नांदेड: तीन आरोपींनी एका विवाहितेस चाकू तथा खंजरचा धाक दाखवून रोख पाच ते सहा लाख रूपयांसह सुमारे ५० ते ६० तोळे सोन्याचे दागिने व एक किलो चांदी असा एकूण तब्बल ३५ ते ४० लाख रूपयांचा ऐवज जबरीने चोरून नेला. ही घटना २६ ऑगस्ट रोजी दुपारी बारा ते साडेबारा वाजेचेदरम्यान, नांदेडच्या ‘सिडको’ वसाहतीतील ‘वात्सल्य’नगर गृहनिर्माण सोसायटीत घडली. मात्र, नांदेड ग्रामीण पोलिसांनी फक्त चार-पाच तासात या प्रकरणातील मुळमुद्देमालासह मुख्य सूत्रधार तसेच त्याच्या अन्य तीन सहकारी आरोपींच्याही मुसक्या आवळले असल्याचे विश्वसनीय वृत्त आहे.

पोलीस सूत्रांकडून मिळालेल्या माहितीनुसार, नांदेडच्या ‘सिडको’ वसाहतीअंतर्गत असलेल्या वात्सल्यनगर सोसायटीतील रहिवासी गोविंदराज दाचावार यांची पत्नी अंकीता गोविंदराज दाचावार या २६ ऑगस्ट रोजी दुपारी त्यांच्या दिड वर्षाच्या चिमुकल्यासह घरी एकटयाच होत्या. दरम्यान, अज्ञात तीन आरोपींनी गुरूवारी दुपारी बारा ते साडेबारा वाजेदरम्यान, उपरोल्लेखित संधीचा फायदा घेत व्यापारी दाचावार यांच्या इमारतीच्या दुसऱ्या मजल्यावरील घरात प्रवेश केला. त्याचवेळी,आरोपी तीन चोरटयांनी अंकीता दाचावार यांना चाकूचा धाक दाखवून घरातील कपाटातील रोख पाच-सहा लाख रुपयांसह सुमारे ५० ते ६० तोळे सोन्याचे दागिने तसेच एक किलो चांदी असा एकूण तब्बल ३५ ते ४० लाख रूपयांचा ऐवज चोरून नेला. उपरोक्त घटनेची माहिती समजताच नांदेडचे अप्पर पोलीस अधीक्षक निलेश मोरे, डीवाय.एस.पी. डॉ. सिध्देश्वर भोरे, नांदेड ग्रामीण ठाण्याचे प्रभारी पोलीस निरीक्षक अशोक घोरबांड, सहाय्यक पो. नि. विश्वजित कासले, पोउपनि. आनंद बिच्चेवार व डी.बी तथा गुन्हे शोध पथकाचे पोउपनि. शेख असद आणि त्यांचे सहकारी पोलीस अधिकारी तसेच कर्मचारी तात्काळ घटनास्थळी धाव घेतली.

विशेष बाब म्हणजे, उपरोल्लेखित अधिकाऱ्यांनी घटनास्थळी भेट देवून पाहणी केल्यानंतर प्रस्तुत घटना गोविंदराज दाचावार यांच्या कुटुंबातील ‘एखाद्या’ सदस्यांच्या सहभागाशिवाय ही घटना घडली नसावी, असा संशय पोलीस अधिकाऱ्यांना आला. विशेष म्हणजे, घटनास्थळाची पाहणी करीत असताना पो.नि. अशोक घोरबांड व गुन्हे शोधपथकाचे पोउपनि. शेख असद यांना प्रस्तुत घटनास्थळी संशयास्पद वावरणारे श्रीनिवास दिलीपराव दाचावार याचा संशय आला. त्याचवेळी, नांदेड ग्रामीण ठाण्यातील गुन्हे ‘शोध’ पथकाचे पोउपनि. शेख असद व त्यांच्या अन्य सहकारी कर्मचाऱ्यांनी पोनि. अशोक घोरबांड यांचे मार्गदर्शनाखाली गोविंदराज दाचावार यांचा सख्खा चुलत भावास म्हणजेच, श्रीनिवास दाचावार यास ताब्यात घेवून त्याची कसून चौकशी सुरू केली. त्याचवेळी, नांदेड ग्रामीण पोलिसांना घरचा भेदी, लंका ढाल या म्हणीचा प्रत्यय आला अण् श्रीनिवास दाचावार यानेही आपणच टीप देवून ही घटना घडवली असल्याची पोलिसांना कबुली दिली. तद्नंतर याप्रकरणाचा मुख्य सूत्रधार श्रीनिवास दाचावार याच्या सहकार्याने ग्रामीण पोलिसांनी आपल्या तपासाची चक्रे जलदगतीने फिरवून अवघ्या चार ते पाच तासात याप्रकरणातील तीन संशयित आरोपींच्या तत्काळ मुसक्या आवळल्या आहेत. एवढेच नाही तर, नांदेड ग्रामीण पोलिसांनी या प्रकरणातील मुळमुद्देमालासह मुख्य आरोपी श्रीनिवास दिलीपराव दाचावार व त्याच्या अन्य सहकारी आरोपींना ताब्यात घेतले असून यामध्ये दोन मोरे आणि एका गोगदरे नावाच्या आरोपींचा समावेश असल्याचे विश्वसनीय वृत्त आहे.

महत्वपूर्ण बाब म्हणजे, या जबरी चोरी प्रकरणातील अन्य आरोपी तसेच उर्वरीत मुद्देमालही लवकरच पोलिसांच्या हाती लागेल, असा विश्वास पो.नि. अशोक घोरबांड व सपोनि. विश्वजित कासले यांनी dsf24news.प्रतिनिधीशी बोलतांना व्यक्त केला आहे.