कर्नाटकात आगामी विधानसभा निवडणुकीची रणधुमाळी सुरु झाली असून सर्व पक्ष मतदारांना आकर्षित करण्यासाठी विविध घोषणा करत आहेत. कर्नाटकचे माजी मुख्यमंत्री आणि जनता दल (धर्मनिरपेक्ष) नेते एचडी कुमारस्वामी यांनी सोमवारी एक लक्षवेधी घोषणा केली. त्यांनी सांगितले की, शेतकऱ्यांच्या मुलांशी लग्न करणाऱ्या मुलींना त्यांचा पक्ष 2 लाख रुपये देईल. कोलार येथील ‘पंचरत्न’ रॅलीला संबोधित करताना कुमारस्वामी यांनी हे वक्तव्य केले आहे. यावेळी ते म्हणाले की, शेतकऱ्यांच्या मुलांसोबत लग्नाला प्रोत्साहन देण्यासाठी सरकारने मुलींना दोन लाख रुपये द्यावेत.

यावेळी एचडी कुमारस्वामी म्हणाले की, “मुली शेतकऱ्यांच्या मुलांशी लग्न करण्यास तयार नाहीत अशी माहिती माझ्याकडे आली आहे. शेतकऱ्यांच्या मुलांच्या लग्नाला प्रोत्साहन देण्यासाठी सरकारने मुलींना दोन लाख रुपये द्यावेत. शेतकरी कुटुंबातून येणाऱ्या तरुणांसाठी हा एक चांगला निर्णय ठरेल.

निवडणूक आयोगाने जाहीर केल्याप्रमाणे कर्नाटक विधानसभा निवडणुकीसाठी 10 मे रोजी एकाच टप्प्यात मतदान होईल आणि 13 मे रोजी निकाल लागेल. कर्नाटक विधानसभेचा सध्याचा कार्यकाळ 24 मे रोजी संपत आहे. त्यापूर्वी निवडणूक आयोगाला निवडणूक प्रक्रिया पूर्ण करायची आहे. 224 सदस्यीय कर्नाटक विधानसभेचा कार्यकाळ 24 मे रोजी संपत आहे.