मेघालयातील हनीमूनच्या दरम्यान नवऱ्याचा खून केल्यानंतर सोनम रघुवंशीने इंदोरमधील भाड्याच्या फ्लॅटमध्ये लपून बसल्याचा धक्कादायक तपशील पोलिस तपासात समोर आला आहे.
सोनमचा नवविवाहित पती राजा रघुवंशी याचा मृतदेह मेघालयातील खोल दरीत सापडल्यानंतर ती ‘गायब’ होती. मात्र, पोलिसांनी तपास सुरु केल्यानंतर इंदोरच्या भाड्याच्या घरात ती लपल्याचे स्पष्ट झाले. या फ्लॅटचे भाडेकरू होते विशाल सिंह चौहान, जो मेघालयमध्ये राजा यांच्यावर सुरुवातीचा वार करणारा पहिला भाडोत्री मारेकरी आहे. इतर दोन मारेकऱ्यांची नावे आहेत आकाश राजपूत व आनंद कुर्मी.
सदर फ्लॅट ३० मे रोजी भाड्याने घेतले गेले होते. याच्या अगोदरच २३ मे रोजी राजा रघुवंशी याचा निर्घृण खून करण्यात आला होता. विशालने पोलिस पडताळणी करून हा फ्लॅट घेतल्याचे तपासात आढळले. त्याने स्वतःला इंटेरिअर डिझायनर म्हणून दाखवले होते व घरमालकास १६ हजार रुपयांचे आगाऊ भाडे दिले होते.
तपासातील आणखी एक धक्कादायक बाब म्हणजे सोनमचा प्रियकर राज कुशवाहा, ज्याने या संपूर्ण कटाचा मुख्य सूत्रधार असल्याचे पोलिसांनी सांगितले आहे. त्याने फ्लॅटमध्ये सोनमसाठी ५ हजार रुपयांचे किराणा सामान ऑनलाइन मागवले होते.
ही घटना सुरुवातीला ‘हरवलेले दाम्पत्य’ म्हणून नोंदली गेली होती. मात्र, तपास सुरु झाल्यानंतर प्रकरणात भीषण सत्य समोर आले. ११ मे रोजी इंदोरमध्ये लग्न झाल्यानंतर राजा व सोनम हनीमूनसाठी मेघालयला गेले होते. २३ मे रोजी नोंग्रियाट गावातील होमस्टेमधून चेक-आउट केल्यानंतर दोघे गायब झाले होते. त्यानंतर २ जून रोजी राजाचा मृतदेह २० किमी अंतरावर खोल दरीत आढळला.
सोनम ८ जून रोजी उत्तर प्रदेशातील गाझीपूरमध्ये सापडली व नंदगंज पोलिस ठाण्यात आत्मसमर्पण केले. दरम्यान, तीन भाडोत्री मारेकरी – आकाश, विशाल व आनंद – यांना उत्तर प्रदेश, इंदोर व सागर (मध्य प्रदेश) येथून अटक करण्यात आली. मुख्य आरोपी राज कुशवाहालाही अटक झाली आहे.
तपासादरम्यान सोनमने पतीच्या हत्येची कबुली दिली आहे. तिच्या चुलत भावाने – जितेंद्र रघुवंशी – पहिल्या हप्त्याचे पैसे मारेकऱ्यांना दिल्याचेही उघड झाले आहे.
सोनमच्या कुटुंबाने तिच्याशी सर्व संबंध तोडले असून तिच्या भावाने – गोविंद रघुवंशी – राजा रघुवंशीच्या कुटुंबाला मदतीचे आश्वासन दिले आहे. देशभरात या प्रकरणाने संतापाची लाट उसळली आहे.
