प्रतिनिधी – जितेंद्र काटे
भुसावळ – येथील पंचायत समितीच्या सभागृहात सन२०२२/२३ व २०२३/२४ या द्विवर्षीय आदर्श शेतकरी पुरस्काराचे वितरण आयोजीत करण्यात आले होते यावेळी कार्यक्रमाचे अध्यक्ष आ. संजय सावकारे तर प्रमुख पाहुणे म्हणून व्यासपिठावर तालुका कृषि अधिकारी अभिनव माळी, भालचंद्र पाटील, सदानंद उन्हाळे, मा. जि.प.सदस्य समाधान पवार, कृषि बाजार समितीचे सदस्य कैलास पाटील व सहा. गटविकास अधिकारी श्री एस डी पाटील उपस्थित होते. पुरस्कारार्थी शेतक-यांमध्ये बन्सीलाल भावलाल पाटील रा. शिंदी यांनी भाजीपाला उत्पादक शेतक-यांना माफक दरात रोपे विक्री करण्यासोबत लागवड व किड -रोग नियंत्रणाबाबत प्रत्यक्ष शेतावर जाऊन मार्गदर्शन करण्यात येते. तसेच 6 तालुक्यातील सर्व जि. प. शाळेत पोषण आहार अंतर्गत मोफत रोपे पुरविली होती.
त्याचप्रमाणे गावांतील सुशिक्षीत बेरोजगार विद्यार्थ्यांना श्री समर्थ कृपा नर्सरी च्या माध्यमातून स्पर्धा क्लासेसचे मोफत वर्ग चालवले जातात. तर दुसरे पुरस्कारार्थी शेतकरी पद्माकर अर्जुन बुंदे रा. कु-हे प्रन ता. भुसावळ यांना रेशीम शेती, सेंद्रीय भाजीपाला उत्पादन, कृषि यांत्रिकीकरण व उत्कृष्ट सिताफळ उत्पादन यासाठी देण्यात आला.
आपले मनोगत व्यक्त करतांना बन्सीलाल पाटील यांनी पुरस्कार स्वरुपात मिळालेली रु. 10,000/- बक्षिस रक्कम शिंदी गावांतील स्मशान भुमीसाठी भेट देण्याचे जाहीर केले. आपले अध्यक्षीय मनोगत व्यक्त करतांना आ.संजय सावकारे यांनी तरुण शेतक-यांनी नोकरीच्या मागे न पळता दोन्ही सत्कारमुर्ती तरूण शेतक-यांप्रमाणे आपल्या शेतीत नाविण्यपूर्ण तंत्रज्ञानाचा अवलंब करून कमी खर्चात अधिक उत्पादन कसे मिळवता येईल या दृष्टीने विचार करून व निर्यातक्षम बाजारभाव कसे मिळेल यासाठी प्रयत्न करावा असे मत व्यक्त केले. यावेळी तालुक्यातील बरेच शेतकरी उपस्थित होते. कार्यक्रमाचे सुत्रसंचालन प्रमोद जाधव (तंत्र व्यवस्थापक आत्मा, कृषि विभाग) यांनी केले कार्यक्रमाच्या यशस्वीतेसाठी कृषि विभागाचे कपिल पाटील (कृषि अधिकारी पं. स. भुसावळ) व इतर अधिकारी व कर्मचारी यांनी परिश्रम घेतले.