देशभरात विविध समुदायात, जाती-धर्मात तेढ पसरवण्याचे प्रयत्न होत आहेत. एका शाळेत मुस्लीम विद्यार्थ्याला हिंदू विद्यार्थ्यांना मारहाण करण्यास सांगण्यात आले होते. ही घटना ताजी असतानाच कर्नाटकात एका शिक्षिकेने मुस्लीम विद्यार्थ्यांबाबत वादग्रस्त वक्तव्य केल्याचे उघडकीस आले आहे. या शिक्षिकेने जातीवाटक टिप्पणी केली आहे. या प्रकरणी शिक्षिकेची बदली करण्यात आल्याची माहिती मिळाली आहे.
उत्तर प्रदेश, दिल्लीनंतर आता कर्नाटकातील मुस्लिम समाजातील दोन विद्यार्थ्यांवर त्यांच्या शिक्षिकेने जातीवाचक टिप्पणी केल्याचे उघडकीस आले आहे. कर्नाटकातील शिवमोग्गा येथील टीपू नगर सरकारी शाळेत कन्नड भाषा शिकवणाऱ्या मंजुळा देवी या शिक्षिकेने इयत्ता पाचवीतील दोन विद्यार्थ्यांवर जातीवाचक टिप्पणी केली. हे विद्यार्थी वर्गात भांडत होते. यावरून मंजुळा देवी रागाच्या भरात त्यांना म्हणाल्या, तुम्ही पाकिस्तानात जा, हा हिंदूंचा देश आहे. त्यांच्या या वक्तव्याने नव्या वादाला तोंड फुटले आहे.
शाळा सुटल्यानंतर विद्यार्थी घरी परतले. त्यांनी ही घटना त्यांच्या पालकांना सांगितली. याबाबत त्यांनी स्थानिक नेत्यांना कळवले. विद्यार्थ्यांच्या तक्रीरावरून शिवमोग्गा जेडीएस नेते ए. नजुल्ला यांनी पोलिसांत तक्रार दाखल केली. त्यांनी दिलेल्या तक्रारीनुसार शिक्षिकेवर कारवाई करण्यात आली आहे. कर्नाटकच्या शालेय शिक्षण आणि साक्षरता विभागाने या शिक्षिकेची बदली केली आहे. मात्र, शिक्षिकेने हे आरोप फेटाळून लावले आहेत. सार्वजनिक सूचना उपसंचालक परमेश्वरप्पा सीआर यांनी म्हटले आहे की, विभागीय चौकशी सुरू असताना शिक्षकाची बदली करण्यात आली आहे. आम्हाला याबाबत गुरुवारी तक्रार मिळाली आहे. ब्लॉक शिक्षणाधिकार्‍यांनी केलेल्या प्राथमिक चौकशीच्या आधारे शिक्षकेविरुद्ध कारवाई सुरू करण्यात आली आहे.
प्राथमिक तपासणीदरम्यान शिक्षिकेने सांगितले की, ती विद्यार्थ्यांना शिस्त लावत होती. कारण विद्यार्थी वर्गात गोंधळ घालत होते आणि शिक्षकांचा आदर करत नव्हते,असे सांगत शिक्षिकेने आरोप फेटाळून लावले आहेत. मुस्लीम विद्यार्थ्याला त्याच्या वर्गमित्रांकडून कानाखाली मारण्यात आल्याचा प्रकार उत्तर प्रदेशात घडला होता. याप्रकरणानंतर ती खासगी शाळा बंद करण्यात आली आहे. तर, तुम्ही पाकिस्तानात का जात नाहीत, असा सवाल दिल्लीतील एका शाळेत शिक्षिकेने विद्यार्थ्यांना विचारला होता. या दोन्ही घटना ताज्या असतानाच कर्नाटकात हा प्रकार घडल्याने संताप व्यक्त होत आहे.
