डेरा सच्चा सौदाचा प्रमुख गुरुमीत राम रहिमवर दखल असलेल्या रंजीतसिंग हत्याप्रकरणी हरयाणा उच्च न्यायालयाने महत्त्वाचा निकाल दिला आहे. गुरमीत राम रहीमसह पाच जणांची निर्दोष मुक्तता करण्यात आली आहे. पंजाब आणि हरयाणा उच्च न्यायालयाने याबाबतचा निर्णय दिला आहे. राम रहिमने सीबीआय न्यायालयाच्या निकालाविरोधात उच्च न्यायालयात धाव घेतली होती. त्यावर, सीबीआय न्यायालयाचा निर्णय रद्द करत हायकोर्टाने हत्याप्रकरणात सर्वांची निर्दोष मुक्तता केली. 22 वर्षांपूर्वीच्या या खटल्यात 19 वर्षानंतर न्यायालयाने राम रहिमसह 5 जणांची मुक्तता केली आहे.
बलात्कार आणि दोन जणांच्या हत्येसह अनेक आरोप रामरहिवर आहेत. या प्रकरणी तो तुरुंगात आहेत. रंजीत सिंगच्या हत्येप्रकरणी 2009 मध्ये सीबीआय न्यायालयाने डेरा सच्चा सौदा प्रमुख राम रहिम आणि इतर 4 जणांना दोषी ठरवत शिक्षा सुनावली होती. त्यानंतर, 18 ऑक्टोबर 2021 रोजी न्यायालयाने राम रहिमसह इतर चौघांना रंजीत सिंह हत्याप्रकरणात जन्मठेपेची शिक्षा सुनावली होती. यासंदर्भाने, राम रहिमने उच्च न्यायालयात धाव घेतली. मात्र, हायकोर्टाने राम रहिमसह पाच जणांची निर्दोष मुक्तता केली आहे.
आरोपी अवतार सिंह, कृष्णलाल, जसबीर सिंह आणि सबदिल सिंह यांचीही न्यायालायने शिक्षेतून मुक्तता करण्यात आली आहे. दरम्यान, एका आरोपीचा कोर्ट ट्रायल सुरु असतानाच मृत्यू झाला आहे. बलात्कार आणि पत्रकार हत्या प्रकरणात राम रहिमची याचिका उच्च न्यायलयात अद्याप प्रलंबित आहे. सध्या राम रहिम रोहतक येथील तुरुंगात आहे.
2002 साली डेरा सच्चा सौदाच्या व्यवस्थापकीय समितीच्या सदस्य असलेल्या रंजीत सिंहची गोळ्या झाडून हत्या करण्यात आली होती. पोलीस तपासावर नाराज असलेल्या रंजीत सिंहच्या मुलाने उच्च न्यायालयात याचिका दाखल करुन सीबीआय तपासाची मागणी केली होती. त्यानंतर, न्यायालयाच्या आदेशाने हे प्रकरण सीबीआयकडे देण्यात आले. सीबीआय तपासात राम रहिमसह 5 आरोपींना दोषी ठरवून सीबीआय न्यायालायने शिक्षा सुनावली होती. 2007 मध्ये कोर्टाने आरोपींविरुद्ध आरोप निश्चित केले होते. सीबीआय न्यायालयाच्या निकालाविरोधात रामरहिमने उच्च न्यायालयात याचिका दाखल केली होती. या प्रकरणी पाचजणांसह त्याची निर्दोष मुक्तता झाल्याने त्याला दिलासा मिळाला आहे.
