30 मे 2025 रोजी आरोग्य आणि कुटुंब कल्याण मंत्रालयाने जाहीर केलेल्या आकडेवारीनुसार, देशातील सक्रिय कोविड-19 रुग्णांची संख्या 2,710 वर पोहोचली आहे. यामध्ये सर्वाधिक रुग्ण केरळमध्ये 1,147, महाराष्ट्रात 467, दिल्लीमध्ये 294 आणि गुजरातमध्ये 223 आहेत.

महाराष्ट्रात एका दिवसात 84 नवीन रुग्ण

महाराष्ट्र सार्वजनिक आरोग्य विभागाने दिलेल्या माहितीनुसार, 30 मे रोजी राज्यात 84 नवीन कोविड रुग्णांची नोंद झाली आहे. त्याचा तपशील असा:

• मुंबई – 32 रुग्ण

• ठाणे महापालिका क्षेत्र – 14 रुग्ण

• ठाणे ग्रामीण – 2 रुग्ण

• नवी मुंबई, कल्याण डोंबिवली – प्रत्येकी 1 रुग्ण

• रायगड – 2 रुग्ण

• नाशिक – 1 रुग्ण

• पुणे महापालिका – 19 रुग्ण

• सातारा – 2 रुग्ण

• कोल्हापूर – 2 रुग्ण

• सांगली – 3 रुग्ण

यामुळे 2025 सालात महाराष्ट्रात एकूण 681 लोकांना कोरोना संसर्ग झाला आहे. सध्या राज्यात 467 सक्रिय रुग्ण उपचार घेत आहेत.

“करोनामुळे घाबरू नका” – सौम्या स्वामीनाथन यांचा सल्ला

WHO च्या माजी मुख्य वैज्ञानिक डॉ. सौम्या स्वामीनाथन यांनी जनतेला आश्वस्त करताना सांगितले की, “करोना आता आपल्या आयुष्याचा भाग झाला आहे. भविष्यात देखील याच्या रुग्णसंख्येत काही प्रमाणात वाढ होत राहील. परंतु लसीकरण आणि शरीरातील प्रतिकारशक्तीमुळे संसर्ग सौम्य स्वरूपाचा राहतो.”

लक्षणांवर उपचार करा, अँटिबायोटिक नाही

त्यांनी पुढे सांगितले की, “कोविडसह कोणत्याही व्हायरल इन्फेक्शनवर अँटिबायोटिक औषधांचा उपयोग होत नाही. गरम पाणी पिणे, गुळण्या करणे, आराम करणे – हेच उपाय उपयुक्त ठरतात. केवळ बॅक्टेरियल इन्फेक्शन झाल्यासच डॉक्टरांच्या सल्ल्याने अँटिबायोटिक्स घ्या.”

तज्ज्ञांचा सल्ला: घाबरू नका, खबरदारी घ्या

तज्ज्ञांच्या मते, सध्याची परिस्थिती गंभीर नाही, पण काळजी घेणे आवश्यक आहे.

• मास्क वापरा

• सामाजिक अंतर पाळा

• हात वारंवार साबणाने धुवा

• डॉक्टरांचा सल्ला घ्या आणि औषधे नियमित घ्या