प्रतिनिधी – जितेंद्र काटे
भुसावळ – दिनांक 12 फेब्रुवारी 2024 रोजी जिल्हा परिषद मराठी शाळा, बेलव्हाळ ता. भुसावळ येथे बाल आनंद मेळावा मोठ्या उत्साहात साजरा करण्यात आला. यामध्ये विद्यार्थ्यांनी पाववडा, गुलाबजामून, गाजरचा हलवा, इडली सांबर, डोसा चटणी, हरभऱ्याची उसळ, पालकाचे भजे, भेळ, छोले भटूरे, पोंगे, बोरवण, कुरडया, पाणीपुरी, कांदा पोहे असे विविध स्टॉल लावले होते. या मेळाव्यामुळे विद्यार्थ्यांनी विविध पदार्थ बनवण्याचा प्रयत्न केला, त्याचप्रमाणे आपल्या आईला पदार्थ बनवण्यास मदत केली. तसेच आर्थिक व्यवहार, पैशांची देवाण-घेवाण असे सर्व हिशोब व्यवस्थितपणे हाताळले.
या बाल आनंद मेळाव्यातून विद्यार्थ्यांना व्यवहारी ज्ञानाचे धडे मिळाले. या बाल आनंद मेळाव्यात शालेय व्यवस्थापन समिती सदस्य, ग्रामपंचायत सदस्य व ग्रामस्थ मोठ्या संख्येने उपस्थित होते. विशेष करून महिला वर्गांची उपस्थिती उल्लेखनीय होती. असा हा बाल आनंद मेळावा मोठ्या आनंदाने व उत्साहाने साजरा करण्यात आला. या बालमेळाव्यात विद्यार्थ्यांनी व्यवहारी कसे असावे आणि हिशोब कसा करावा या बाबत मुख्याध्यापक किशोर माळी व उपक्रमशील शिक्षक रवी पढार यांनी तयारी करून घेतली. दिवसभर बेलव्हाळ गावात बाल मेळाव्या बाबत चर्चा सुरू होती तर मुख्याध्यापक किशोर माळी व उपक्रमशील शिक्षक रवी पढार यांच्या कार्याचे कौतुक बेलव्हाळ ग्रामस्थांनी केले आहे.