प्रतिनिधी – जितेंद्र काटे
भुसावळ – तालुक्यातील सुनसगाव येथे मुलीला जन्माला घालून जाळून नष्ट करण्याचा प्रयत्न केला असल्याने माता न तू वैरीणी या म्हणीचा प्रत्यय आला असून संशयित महिलेला भुसावळ तालुका पोलिसांनी ताब्यात घेतले असून गुन्हा दाखल करण्याचे काम सुरू आहे.
या बाबत भुसावळ तालुका पोलिसांनी दिलेली माहिती अशी की , सुनसगाव पोलीस पाटील खुशाल पाटील यांनी फिर्याद दिली आहे . दि.१४ मार्च रोजी सकाळी ११ ते १२ वाजेच्या सुमारास गावातील दोन तीन लोकांनी फोन करून सांगितले की वार्ड क्रमांक तीन मध्ये कृष्णा तोताराम भोळे यांच्या मई शेती शिवाराकडून घरांच्या बाजूला एक स्री जातीचे नवजात अर्भक पुर्ण दिवसांचे अर्धवट जळालेल्या अवस्थेत दिसत असल्याने गावात एकच चर्चेला उधाण आले होते.
या बाबत भुसावळ तालुका पोलीस स्टेशन चे पो नि बबनराव जगताप , सहाय्यक पोलीस निरीक्षक विशाल पाटील, पोहेकाॅ युनूस शेख , महिला पोलीस राणी परदेशी , पोकाॅ उमेश बारी व चालक सादिक शेख घटनास्थळी दाखल झाले असता त्यांनी तपासचक्रे फिरवली असता घटनास्थळी शेजारी असलेल्या महिलांची विचारपूस करीत असताना एक महिला घराबाहेर एकटी बसलेली दिसली असता तीला विचारले असता सुरवातीला उडवाउडवीची उत्तरे दिली त्यामुळे घरातील मुलीला विचारले असता हळूहळू माहिती हाती येऊ लागल्याने पोलीसांनी खाकी दाखवताच संशयीत महिलेला पोलीसांनी ताब्यात घेतले आहे ही महिला सुनसगाव शिवारात असलेल्या कंपनी मध्ये कामाला असल्याचे सांगितले जात आहे.
फाॅरेन्सिक लॅब ला पाचारण –
मयत स्री जातीचे नवजात अर्भकाच्या काही चाचण्या घेण्यासाठी भुसावळ तालुका पोलीस स्टेशन चे पो नि बबनराव जगताप यांनी फाॅरेन्सिक लॅब जळगाव च्या पोलीस पथकाला पाचारण केले या पथकातील पोहेकाॅ एच सी शेख , योगेश वराडे, किरण चौधरी व शिवदास नाईक यांनी कार्यवाही केली.
मृतदेहाचे शवविच्छेदन करण्यासाठी भुसावळ येथील ट्रामा सेंटर येथे पाठविण्यात आले असता भुसावळ येथून जळगाव जिल्हा सामान्य रुग्णालयात पाठविण्यात आल्याचे समजते. ऊशीरा पर्यंत पोलीस चौकशी करून पुढील कारवाई करण्यात येणार असल्याचे सांगितले जात आहे. या घटनेमुळे परिसरात खळबळ उडाली आहे.
