नवी दिल्ली – निवडणुकीत NDA ने बहुमत मिळवत केंद्रात सरकार स्थापन केले. नरेंद्र मोदी हे सलग तिसऱ्यांदा पंतप्रधान बनले आहेत. अशातच मोदी सरकारच्या तिसऱ्या कार्यकाळातील 18 व्या लोकसभेचे पहिले अधिवेशन आजपासून सुरू होणार आहे.
यामध्ये पंतप्रधान नरेंद्र मोदी यांच्यासोबत नवनिर्वाचित खासदार शपथ घेणार आहेत. त्यानंतर सभापतीपदासाठीही निवडणूक होणार आहे. तसेच राष्ट्रपती द्रौपदी मुर्मू या दोन्ही सभागृहांच्या संयुक्त बैठकीला संबोधित करणार आहेत.
NDA कडे बहुमत
लोकसभा निवडणुकीनंतर नवीन सरकार स्थापन झाले. या 18 व्या लोकसभेत एनडीएकडे 293 जागांसह बहुमत आहे. यामध्ये भाजपकडे 240 जागा आहेत. तर विरोधी पक्ष इंडिया आघाडीकडे 234 जागा असून त्यापैकी काँग्रेसकडे 99 जागा आहेत.
PM मोदी घेणार खासदारकीची शपथ
पंतप्रधान नरेंद्र मोदी आणि त्यांच्या मंत्रीमंडळातील सदस्य आज सकाळी 11 वाजता खासदारकीची शपथ घेणार आहेत. सर्वप्रथम पंतप्रधान शपथ घेतील. त्यांच्यानंतर मंत्रिमंडळातील इतर सदस्य शपथ घेतील. यानंतर विविध राज्यांतील खासदार शपथ घेतील. सर्वप्रथम आसाम राज्यातील खासदार शपथ घेतील आणि शेवटी पश्चिम बंगालमधील खासदार शपथ घेतील. या अधिवेशनाच्या पहिल्या दिवशी पंतप्रधान मोदी आणि त्यांच्या मंत्रिमंडळासह 280 नवनिर्वाचित खासदार शपथ घेणार आहेत. तर दुसऱ्या दिवशी 264 नवनिर्वाचित खासदार शपथ घेणार आहेत.
लोकसभेच्या सभापतीपदावरुन वाद
भाजपचे नेते आणि सातवेळा खासदार भर्तृहरी महताब यांचे नाव लोकसभेच्या अध्यक्षपदासाठी आघाडीवर आहे. मात्र यावरुन वाद निर्माण झाला आहे. या वादाचा परिणाम अधिवेशनाच्या पहिल्याच दिवशी दिसून येण्याची शक्यता आहे. संसदीय कामकाज मंत्री किरेन रिजिजू यांनी म्हटले की, ‘भर्तृहरी महताब सलग सात वेळा लोकसभेचे सदस्य राहिले आहेत, त्यामुळे ते या पदासाठी पात्र उमेदवार आहेत.’
सकाळी 11 वाजता कामकाजाला सुरुवात होणार
18 व्या लोकसभेच्या पहिल्या अधिवेशनाचे कामकाज सकाळी 11 वाजता सुरु होणार आहे. सर्वप्रथम सर्व सदस्य मौन बाळगतील आणि त्यानंतर कामकाजाला सुरुवात होईल. यानंतर लोकसभेचे महासचिव उत्पल कुमार सिंह हे लोकसभेवर निवडून आलेल्या सदस्यांची यादी सभागृहाच्या टेबलवर ठेवतील. यानंतर पंतप्रधान मोदींना सभागृहाचे सदस्य म्हणून शपथ घेण्यासाठी आमंत्रित केले जाईल. त्यानंतर मंत्रिमंडळाचे सदस्य आणि इतर खासदारांचा शपथविधी होईल. या शपथविधीनंतर लोकसभेचे कामकाज पार पडेल. मोदी सरकारच्या तिसऱ्या कार्यकाळातील पहिल्या अधिवेशनात काय निर्णय घेतले जाणार याकडे सर्वांचे लागले आहे.
