राष्ट्राशी गद्दारी करून गुवाहाटीला गेलेल्या शिंदे गटाविरोधात राष्ट्रवादी काँग्रेस पक्ष आक्रमक झाला आहे. येत्या 20 जून रोजी या गद्दारीला एक वर्ष पूर्ण होईल. या दिवशी धोक्यातून सत्तेवर आलेल्या खोके सरकारच्या निषेधार्थ संपूर्ण राज्यभर ‘गद्दार दिवस’ साजरा करणार आहे. राष्ट्रवादीचे प्रदेशाध्यक्ष जयंत पाटील यांनी तशा सूचना पक्षाचे सर्व पदाधिकारी आणि कार्यकर्त्यांना केल्या आहेत.

खोक्यांचे राजकारण करून धोक्याने सत्ता बळकावलेल्या गद्दारांची सत्तेतून पायउतार व्हायची वेळ आली आहे. यासाठी ‘गद्दारांचे डोके, खोक्यांनीच केले ओक्के’ ही घोषणा राज्याच्या कानाकोपऱ्यापर्यंत देऊन या खोके सरकारचा निषेध व्यक्त करावा. शिंदे सरकार हे खोक्यांमुळेच ओक्के केले असल्याने या सरकारचे हे क्षणिक सुखाला उतरती कळा लागली आहे हा विश्वास जनतेला पटवून देण्याचा निर्धार करावा, असे आवाहन जयंत पाटील यांनी केले आहे.

खोके सरकारच्या निषेधार्थ 20 जून रोजी शहराच्या प्रमुख ठिकाणी या खोके सरकारविरोधात प्रतीकात्मक खोक्यांचा देखावा उभा करावा. अशा प्रकारे पक्षाच्या सर्व पदाधिकारी व कार्यकर्त्यांनी मिळून निषेध व्यक्त करावा, अशा सूचना जयंत पाटील यांनी दिल्या आहेत.